VIGAN CITY – Saan nga atapen ti Commission on Human Rights nga adda nakainaigan iti kaso ni Senador Leila De Lima ti pannakatay dagiti high profile drug lord idiay New Bilibid Prison a nakairamanan ti Jaybee Sebastian.
Iti pannaki-uman ti Bombo Radyo Vigan ken ni Spokesperson Jacqueline De Guia, rumbeng nga insigida a naipakaammo kadagiti pamilia dagiti balud iti pannakatayda ken naimbestigaran kalpasan ti pasamak.
Marso pay laeng idi nakikammayetdan kadagiti jail authorities ken nabayagen a kidkiddawenda iti gobierno a bantayan iti kasasaad dagiti balud ita a tiempo ti Covid19.
Ingunamgunam ti opisial a kasapulan iti nalawag nga impormasion ti Bureau of Corrections no ania iti sasaaden ti tunggal balud tapno matulongan ti gobierno nga agtignay para iti COVID19.
