Kinarit ni Palace Press Officer Atty. Claire Castro ni Atty. Nicholas Kaufman a mapan ditoy pagilian ken imbestigaranna dagiti maibagbaga nga adu a napapatay a drug suspect iti salinong ti Marcos administration, ngem awan ti interes ti gobierno nga imbestigaran daytoy.
Segun ken ni Castro, rugianen ni Kaufman ti agimbestigar tapno mapaneknekan ti ibagbagana nga adu a napapatay a drug suspect iti salinong ti agdama nga administrasion.
Innayon ni Castro nga adu ti nasken nga asikaswen ni Kaufman para iti kliyentena a ni dati a Presidente Rodrigo Duterte ngem nakatutok pay laeng ti atensionna ken ni Presidente Ferdinand Marcos Jr.
Para iti nasao a Palace Press Officer, ti ar-aramiden ita ni Kaufman ket kasla saan a ti kliyentena ti kayatna nga insalakan, ken amangan ta adda sabali a political career nga isalsalakanna.
