Nagkiddaw ni Cassandra Ong a mapalubosan a makaduana iti gayyemna iti detention cell-na iti Correctional Institute for Women (CIW), kabayatan ti House Quad Committee hearing.
Segun kenni Ong, makapadpadas ti nakaro nga anxiety ken anxiety attacks, ken iti agdama ket adda iti nakaro a depression.
Adda ni Ong iti Correctional Institute for Women gapu iti panang-contempt iti QuadComm gapu iti panagkedkedna a mangipakita kadagiti dokumento maipapan iti Lucky South 99, maysa a POGO firm a maipagarup a karaman iti illegal nga aktibidad.
Sumagmamano a kameng ti QuadComm ti nangsuporta iti kiddaw ni Ong, ngem nagdesisyon ti komite nga umuna a makiuman iti liderato ti CIW tapno makita no ipalubos ti polisiada.
Nagkiddaw met ni Laguna Rep Dan Fernandez a mangibaon iti House medical team iti CIW tapno ma-assess ti kasasaad ni Ong.
Immanamong dagiti kameng ti QuadComm, pakairamanan ti over-all chairman a ni Surigao del Norte Rep. Ace Barbers, tapno masurot ti desision ti CIW.
