Agbiahe a mapan idiay Roma inton Huebes, April 24, 2025 ni Bishop Pablo Virgilio Cardinal David a presidente iti Catholic Bishops’ Conference of the Philippines kas kinuna ti Diocese of Kalookan.
Manamnama nga agturong idiay Roma dagiti cardinal manipod iti agduduma a paset iti lubong para ti funeral ni Pope Francis.
Mangisayangkatda pay iti general congregations wenno taripnong para iti panagsagana iti eleksyon para iti baro a santo papa.
Tallo a Filipino cardinals iti mabalin a makipaset iti papal election nga isu da Luis Antonio Tagle, Jose Advincula ken David.
Maipalagip nga idi Lunes ket natay ni Pope Francis iti tawenna a walopulo ket walo gapu ti stroke ken irreversible heart failure.
Immunan a nagsagaba iti double pneumonia a gappuanan ti pannaka-ospitalna iti nasurok makabulan.
Impakaammo ti Vatican a ti funeral service na ket maisayangkat inton Sabado iti St. Peter’s Square.
