Inkalintegan ti Commission on Audit ti notice of disallowance iti P73 million confidential funds nga inusar ti Office of the Vice President (OVP) idi Disyembre 2022, kalpasan a maipagarup a napaay nga agipasa ti naan-anay a dokumento kas pammaneknek iti panagaramat daytoy.
Iti panagdenggeg ti House Committee on mainaig ti impeachment complaints kontra ken ni Bise Presidente Sara Duterte, kinumpirma ti COA a ti nadakamat a disallowance ket kayat na sawen a masapul nga isubli ti kuwarta dagiti umili.
Segun ti ahensia, saan a napaneknekan ti OVP a ti nagastos a pondo ket nausar para kadagiti lehitimo a confidential activities, kas ti intelligence gathering, panagbayad kadagiti informant, nga agkasapulan ti dokumento kas panangsurot iti pagannurotan.
Kalaksidan iti P73 milyon, imbutaktak pay ti COA nga adda pay naisina a P375 milyon a confidential funds ti OVP para iti tawen 2023 a sakop ti notice of disallowance, banag a maiur-uray pay ti pormal a panangilawlawag ti opisina.
