VIGAN CITY – Ipapilit ni Cagayan de Oro Rep. Rufus Rodriguez a maysa kadagiti nangisurat ti Good Conduct Time Allowance (GCTA) a masapul nga agpalawag ni Bureau of Corrections (BuCor) chief Nicanor Faeldon gapu ti madi nga interpretasyon na iti linteg isu nga adda dagiti kriminal a nawaya-wayaan ken ngan-ngani pay nawaya-wayaan ni dati a Calauan, Laguna Mayor Antonio Sanchez a nakonbiktaran kadagiti naka-am-ames a krimen iti panagrames ken pammapatay.
Malaksid iti dayta, rumbeng pay a madusa ni Faeldon gapu ti panangbay-bay-a na a pirmaan iti inpatugaw na nga officer-in-charge iti release order ni Sanchez a naipatungpal kuma nu saan a naamuan iti publiko ken dagiti maseknan nga opisyal iti gobiyerno.
Ti pannaki-uman ti Bombo Radyo Vigan ken ni Rodriguez, kalikaguman na a mailawlawag ti BuCor chief nu kasanu a nabenepisyaran ti GCTA dagiti suspek iti pannakarames ken pannakapapatay ti agkabsat a Chiong ken nu kasanu nga adda iti napirmaan a release order ni Sanchez.
Kinunana, nalawag iti nakailanad iti linteg nga inaramid da a dagiti balud a nakonbiktaran kadagiti nakaam-ames a krimen kas iti panagrames, pammapatay ken dadduma pay ket saan a mabalin a mabenepisyaran ti GCTA.
