VIGAN CITY – Dunor iti akin-kannigid a takyag ti sinagaba ni Noren Borje Cachola, agtawen iti tallopulo ket lima, naasawaan, traysikel driver ken barangay tanod ta pinaltogan ti dati a chief tanod a ni Reynante Cariño Piano, agtawen iti uppat a pulo ket pito, awanan trabaho nga agpada nga agnaed idiay Barangay Sinabaan, Bantay, Ilocos Sur itay alas dos kuarentay singko iti parbangon.
Iti pannakipapatang ti Bombo Radyo Vigan ken nu PLt. Reynaldo Reynon a Deputy Chief of Police iti Bantay Municipal Police Station, nakaawatda ti pakaammo manipod ti concerned citizen inaig ti pammaltog iti nasao a lugar isu a nagrespondeda ngem idi nakadanonda ket awan ti biktima ken suspek iti nasao a lugar.
Segun kenkuana, sinapulda ti biktima ket nasarakanda idiay Bulag Elementary School ket imbagana ti nangpaltog kenkuana.
Naamoan a sakbay iti insidente ket kellaat a nagturong ti biktima iti ayan ti suspek a makin-inninom ket binagaanna a durog agingga napasamak iti pammaltog.
Naipan ti biktima iti Metro Vigan Hospital para ti pannakatamingna idinto a naisayangkat ti hot pursuit operation kontra iti suspek ngem bayat ti operasyon ket simmuko kadagiti pannakabagi ti linteg.
Nupay kasta awan ti naiparang wenno insuko a paltog ti suspek.
VIDEO – PLT. REYNALDO REYNON
Pinasingkedan ni Barangay Captain Marlon Nuñez manipod Barangay Sinabaan, Bantay a kaduada ti suspek idi dimteng ti biktima ket ibagbagana laeng ti sarita a “sika ti durog” iti suspek.
Segun ti Kapitan, gapu ti danag ni misisna idi dimteng ti biktima ket intulodna pay laeng iti pagtaenganda agingga nakanggegda laengen ti putok ti paltog.
Inlawlawagna nga awan met ti nagririan dagiti dua idi kallabes a mabalin koma a gappuanan ti pammaltog.
VIDEO – BARANGAY CAPTAIN MARLON NUÑEZ
