Pinasingkedan ti Bureau of Quarantine iti Department of Health (DOH-BOQ) nga awan pay iti nairekord wenno na-detect a kaso ti Nipah virus iti pagilian ken impasiguradoda nga adda maipatpatungpal nga addang tapno masalakniban iti publiko.
Segun ken ni BOQ officer-in-charge Dr. Roberto Salvador, 24/7 iti panagbantay iti ahensya kadagiti pasahero kadagiti pantalan ken airport.
Manipod bimtak iti issue iti Nipah virus ket awan pay iti namonitor a virus kadagiti naggapu iti India.
Kinunana a dakkel a tulong ti e-Travel system iti panangsubaybay kadagiti sumangsangpet a biahero kangrunaan dagiti aggapu iti India, ta dua a kason iti nairekord iti nasao a pagilian.
Inlawlawag ti DOH nga adda proactive measure kadagiti port ken airport kas iti infrared thermal scanners, dagiti BOQ nurse nga agmon-monitor iti temperatura, ken dagiti spotter a mangkitkita iti posible a sintomas a kas ti rashes.
Pinalagipanna iti publiko nga agannad no agbibiahe iti sabali a pagilian.
Kabayatanna, pinasingkedan ti DOH spokesperson Dr. Albert Domingo a naudin a nairekord ti Nipah virus iti Pilipinas idi 2014 ken agtultuloy nga imon-monitor iti DOH Epidemiology Bureau.
