VIGAN CITY – Naragsak nga impakammu ni Jadelhyn Calixterio a nasapolannan ti pudno a nagannakna kalpasan iti innem a tawen a panangsapsapolna kadakuada.
Iti pannaki-uman ti Bombo Radyo Vigan kenni Jadelhyn Calixterio, ado iti mensahe a naawatna manipod nainterview idi ti Bombo Radyo Vigan a mangsapsapol ti anakda ngem iti maykatlo a pamilya a nangipatulod kenkuana ti message ti nagkalikagum iso a naidalanda nga insigida ti DNA Test.
Saanna a mailadawan iti ragsak a marikriknana kalpasan a rimmuar ti resulta a positibo nga isuda ti pamilyana a manipod ti Laguna.
Innayonna a biktima ni Jadelhyn ti maysa a kidnapper a ni Roger Rama a nangibati kenkuana ta kamkamaten idin ti pulis nga iso iti pannakakita kenkuana dagiti agasawa a Daisy Calixterio ken Jerry Calixterio a nangpadakkel ken nangtaripato kanyana.
January 1 napasamak iti pannakapukawna kabayatanna nga agkadduada ti lola na ket idi January 2 nagpatulongda ti maysa a nangato nga opisyal ti PNP a kabagyanda ket naipasarra dagiti amin a rummuaran ken sumbrekan idiay Dagupan pakairamanan ti airport ngem naiyawid idin ti pamilya Calixterio ditoy Ilocos Sur.
Agyamyaman ni Jadelhyn wenno Joyce Ann Rosario Cabiguin kadagiti amin a naayat a nangtulong kenkuana kangrunaan ti Bombo Radyo Vigan manipod rinugyananna iti panangsapol ti pamilyana.
