Pormal a na-ordain kas obispo ni Most Rev. Nick Argel Vaquilar babaen ken ni Cotabato Archbishop Emeritus Cardinal Orlando Quevedo iti naisayangkat a Solemn Eucharistic Celebration and Episcopal Ordination idiay St. Augustine Parish Church, Bantay, Ilocos Sur kas panangsagsagana iti panagserbina kas maikapat nga Obispo ti Diocese of Urdaneta.
Ti okasyon ket indaulwan ni Nueva Segovia Archbishop David William Antonio ken ni Papal Nuncio Charles Brown a dinar-ayan dagiti padi, obispo, ken dagiti rinibo nga agpammati manipud iti Northern Luzon.
Iti mensahe ni Vaquilar, pinagyamananna ni Pope Leo XIV iti talek nga impaayna kenkuana.
Kinunana nga inawatna ti misyon a napnuan pammati iti Namarsua ken panagayat iti Simbaan.
Ikarkararaganna met a maserbianna dagiti tattao a napnuan met laeng iti pammati.
Ni Bishop Vaquilar, a tubo iti San Juan, Ilocos Sur ken dati a rector ti Immaculate Conception School of Theology iti Vigan ket dinutokan ni Pope Leo XIV kas maikapat nga Obispo ti Diocese of Urdaneta.
Paset iti panagsagana iti okasyon ti panangipatungpal ti lokal a gobierno ti Bantay iti traffic advisory gapu iti idadar-ay dagiti deboto ken bisita iti seremonia.
