Isayangkat a nasimsimple ti Vigan City ti Viva Vigan Binatbatan Festival of the Arts 2026 kas panaginut ti city government gapu iti agdama a sitwasion iti intero a lubong.
Dayta ket kalpasan a napagnunumuan dagiti stakeholder babaen iti naisayangkat a konsultasion a pagbalinen a simple ti panangrambak ti nasao a piesta ita a tawen.
Uray no adda sumagmamano nga aktibidad a maikissay, agtultuloy latta a maisayangkat dagiti tradision a pakabigbigan ti siudad.
Karaman ditoy ti Misa con Celebrada para ken ni Apo Lakay, Ramada wenno dagiti tradisional nga ay-ayam tunggal piesta, Damili Jar Painting Competition, Boklan Art Competition, panangisagut iti sabong kas panangpadayaw ken ni Isabelo de los Reyes, Medical Mission kas panangrambak iti Labor Day, ken ti Food Fair – nga amin ket maisayangkat nga adda panagannad ken husto a panagaramat iti pondo.
Kas maysa a heritage city a naimuli iti kultura ken turismo, tarigagayan ti siudad nga ituloy dagiti aktibidad a mamagtipon iti komunidad ken sumuporta iti lokal nga ekonomia.
Nagyaman ti siudad iti panagawat, agtultuloy a suporta ken panagayat ti amin para iti Heritage City of Vigan.
