VIGAN CITY – Posible a ngumato pay ti bilang dagiti makaptan ti COVID19 ditoy probinsia ta saan pay a nalpas ti maisaysayangkat a contact tracing ken swab testing.
Iti pannaki-uman ti Bombo Radyo Vigan ken ni Dra. Trina Tabboga-Talaga, saan pay a nalpas iti pannakaidalan ti swab test dagiti nakapulapol ni IS-C180 a nagtaudan iti local tranmission ti coronavirus disease idiay ili ti Cabugao.
Nagkiddaw ni Talaga kadagiti umili a makitinnulong kadakuada tapno maduktalan no asino pay dagiti nakapulapol ti pasyente a posible a nakaptan iti virus ken tapno saanen a marigatan dagiti contact tracer ken dagiti agisayangkat ti swab testing.
Naidalanen iti Modified Enhanced Community Quarantine ti Cabugao nga isu iti adda iti umuna a pwesto ti probinsya a nangato iti bilang ti pasiente nga addaan ti COVID19 ta addan duapulo ket lima ti total cases.
