Kinumpirmaran ti Bureau of Immigration (BI) a ginasut a Pilipino idiay Myanmar iti saan pay a na-rescue manipod kadagiti scam hubs idiay Myawaddy.
Segun ken ni Mary Jane Hizon a hepe iti BI Immigration Protection and Border Enforcement Section, dagiti nasurok tallo gasut a Pinoy repatriates a naiyawid iti pagilian idi kalman ket manipod laeng iti maysa nga scam hub idiay Myawaddy wenno ti KK Park.
Kinuna ni Hizon nga adu pay iti scam hubs iti saan pay a nastrek dagiti otoridad.
Inlawlawag ni Hizon nga ad-adu nga African iti biktima iti human trafficking idiay Myanmar ngem kadagiti Pilipino.
Kinumpirmaran met ni Hizon nga iti Myawaddy laeng iti lugar idiay Myanmar iti pagip-ipanan kadagiti biktima iti human trafficking ta napalawlawan daytoy iti kabambantayan.
