Agtultuloy iti panagpalagip ti Bureau of Fire Protection – Vigan iti publiko kasangwanan ti paskua ken baro a tawen kagiddan ti panangisayangkatda ti OPLAN PAALALA IWAS PAPUTOK 2025.
Iti pannaki-uman ti Bombo Radyo Vigan ken ni SFO2 Analyn de Vera a Chief Fire Safety Enforcement Section iti BFP-Vigan, manipod pay December 1 ket ipatpatungpaldan ti firetruck visibility ken public address tapno palagipan dagiti umili nangruna iti panagusar iti paputok.
Segun ken ni de Vera, ipagpaganetgetda iti panagaramat laeng iti legal a paputok ket saan nga agusar kadagiti maiparit tapno awan iti maisagmak.
No maipanggep met kadagiti pagtagilakoan iti paputok ket monitoren iti BFP kadua dagiti kameng ti Philippine National Police nangruna kadagiti mapan aggatang ta siguradoenda a ma-inspect sakbayda a sumrek iti pagtagilakoan.
Kinunana a rumbeng a masigurado nga awan iti naikarga a puspuro wenno lighter kadagiti bag wenno uray nakabulsa kadagiti umili.
Innayonna nga iti baet nga asideg laeng iti fire station ti pagtagilakoan iti paputok ket masapul a nakasagana latta dagiti aglaklako babaen ti kaadda ti danum, fire extinguisher ken darat iti asidegda a mabalinda nga alaen no kas bilang adda ti emergency.
