Patien ti Chairperson ti BAYAN Europe nga awan ti maubraan ti Zero Remittance Week a plano nga isayangkat dagiti Overseas Filipino Workers inton March 28 agingga April 4, 2025 ta awan ti pakainaiganna dayta iti kaso ita a sangsangwen ti dati a president Rodrigo Duterte a nakadetain idiay The Hague.
Iti pannaki-uman ti Bombo Radyo Vigan ken ni Professor Phoebe Sanches, saan a maiyawid ni Duterte ditoy Pilipinas uray saan nga agpatulod iti remittances dagiti OFW ta awan ti pakainaiganna dayta iti kaso a crimes against humanity a sangsangwen ti dati a presidente.
Impaganetgetna nga uray ubraen dayta dagiti OFW ket saan nga isu ti rason a panangisubli ti ICC ken ni Duterte iti pagilian.
Patienna nga uray maipanawagan ken ni President Ferdinand Marcos Jr. iti pannakaiyawid ken ni Duterte ket saanna pulos a kiddawen iti ICC ta dakkel iti impact a mabalin nga ipaayna iti pagilian nangruna iti posible a magastos ta amangan nu isu ti rason a panagutang iti Pilipinas iti World Bank ken International Monetary Fund tapno makakiddaw iti pondo a maaramat.
Inyunay-unayna a ti pannakakemmeg ni Duterte ket saan a gapu iti isyu ti nagbaetan ni Marcos ken Duterte nu diketdi maipanggep kadagiti nagbalin a biktima bayat ti war on drugs iti Duterte Administration.
