VIGAN CITY – Nangiparuar ni Sta. Lucia Mayor Joseph Simon Valdez ti baro nga executive order a mangiparit iti pannakaiserrek ken panangiparuar dagiti agtartaraken ti baboy kadagiti sabali a lugar tapno malapdan ti African Swine Fever.
Iti pannaki-uman ti Bombo Radyo Vigan ken ni Valdez, saan pay laeng a makastrek iti ilida dagiti frozen meats ken dagiti karne ti baboy gapu iti pannakaapektar ti ASF dagiti baboy idiay Bario-an, Tagudin ken iti ili ti Sta. Cruz.
Gapu ti dayta, nainget ti pannakikinnammayetda kadagiti kapitan iti tunggal barangay tapno mabalakadanda dagiti kalugaranda a saanda pay a mangal-ala iti taraknenda a baboy nga aggapu kadagiti sabali a lugar.
Kiddawen ti mayor kadagiti amin a kailianna tapno sumurotda iti nayetnag a paglintegan tapno saan a makaptan ti ASF dagiti tarakenda a baboy.
Dagiti agnegnegosyo ket rumbeng nga iti pay laeng uneg ti ili ti paglakwanda ken saandan a mapan iti sabali pay a lugar.
