Pinasingkedan da Impeachment Adviser Ace Barbers ken Rep. Renee Co nga awan ti basaran ti alegasion nga adda ‘bending the law iti impeachment trial ni Vice President Sara Duterte.
Segun ken ni Barbers, binigbigen ti Korte Suprema a maitunos iti Saligang Batas ti nagbalin a proseso ti impeachment idiay Kamara.
Pinasingkedan na nga adda iti kampo ti depensa ti responsibilidad a babalawen dagiti alegasion babaen iti napigsa ken natibker nga ebidensia.
Kabayatanna, pinasingkedan met ni Representative Co a masapul nga ilawlawag ti Office of the Vice President ti maipagarup nga irregularidad iti panagaramat ti confidential ken intelligence funds.
Segun kenkuana, rinibo nga acknowledgement receipts ti naipasa ngem awan met ti official receipts ken adda dagiti nagastos a mapapati a saan a mapalubosan iti salinong ti linteg.
