Maidalan iti extreme enhanced community quarantine wenno total lockdown ti Barangay Magsaysay, Tagudin kalpasan a nakumpirmaran ti kaunaan a kaso ti coronavirus ditoy probinsia.
Dayta ti indeklrar ni Governor Ryan Singson kagiddan iti panangibilinna a maisayangkat ti contact tracing kadagiti nakapinnulapol ti pasyente malaksid laeng iti pamiliana.
No man pay awan ti travel history-na iti sabali a pagilian nga apektado ti COVID-19 ti pasyente nga agtawen ti limapulo ket lima a babai, dakkel ti posibilidad a na-exposed iti anakna a naggapu idiay Amerika a nagawid idi March 8 ken addaanen ti sintomas iti nasao a sakit ngem saan nga immin-inom ti agas ken saan a nagpa-ospital.
March 18 idi makarikna ti sintomas ti COVID-19 ti pasyente ngem saan a nagpa-ospital agingga idi naawanan ti puot idi March 21 isu a naitaray idiay Ilocos Sur District Hospital – Bio, Tagudin ngem naiyakar idiay Bethany Hospital, San Fernando City, La Union nga isu ti nakatakuatan a positibo iti nasao a sakit.
Iti agdama, natalged ti kasasaad ti pasyente ngem kasapulan pay a maobserbaran iti sangapulo ket uppat nga aldaw.
