Natay gapu iti pannakalmesna ti maysa a barangay kagawad iti karayan idiay Lucotan River, Brgy Suysuyan, Lidlidda, Ilocos Sur.
Nabigbig ti biktima a ni Ronnie Ganado Pacsa, agtawen iti uppat a pulo ket lima, agnaed iti Brgy. Suysuyan, Lidlidda.
Nakaawat ti Lidlidda Police Station ti report mainaig ti pasamak a pannakalmes iti nadakamat a lugar, isu a dagusda a nagresponde.
Iti pannaki-uman ti Bombo Radyo Vigan ken ni PLT John Albert Juan, Deputy Chief of Police ti Lidlidda Police Station, napan ti biktima kadua dagiti gayyemna iti alas otso y media iti agsapa iti karayan tapno mapan agkammel ket nagawidda kalpasan ti pangngaldaw.
Idi alas singko iti malem, nagsublida ken ti apona iti karayan a napan naglangoy ngem nakainomen ti biktima iti dayta a gundaway agingga a nakita dagiti agindeg nga agpapaarayat ti apona.
Dagus met a nagresponde ti RHU-Lidlidda ket intarayda ti biktima iti Candon General Hospital ngem naideklarar a dead on arrival.
Mapatta-patta a sangapulo a minutos nga adda iti danum ti karayan sakbay a nasarakan ti nalmes a biktima.
