Impalagip ti Korte Suprema a maiparit ti panangiruar wenno panang-expose ti score ita nga umadanin ti pannakairuar ti 2024 Bar Examinations.
Iti guidelines, panaglabsing ti probisyon ti Data Privacy Act ti panangiruar ti Bar Exam score ti maysa nga examinee nga awan ti consent wenno pammalubos ta maibilang dayta a personal information.
Mabalin nga agkiddaw ti Bar Exam scores dagiti law school manipod Korte Suprema nu laketdi aggregated wenno napagkakadua ti resulta ken saan a nabigbig iti maymaysa laeng a Bar exam taker.
Inlawlawag ti Korte Suprema a mabalin pay nga iruar dagiti numero wenno porsiento dagiti law school graduate a naka-categorize, bilang wenno porsiento ti Bar takers ken ti average score iti amin a graduates iti tunggal bar subject.
Ngem masapul a pirmado ti dean ti request a maipatulod ti Korte Suprema ken adda nakalanad a lehitimo a gagem iti panagala ti Bar Exam scores.
Manamnama nga iruar ti Korte Suprema inton Biernes, December 13, 2024 ti resulta ti 2024 Bar Exams a naisayangkat idi Setyembre.
