Nagdesision ti bicameral conference committee a maisubli iti P889 milion ti alokasion para iti Office of the Vice President iti 2026 budget nga orihinal nga intuding ti Malakanyang.
Segun ken ni Nueva Ecija Rep. Mikaela Sunasing, chair ti House Committee on Appropriations, naikabil iti bersion ti kamara ti General Appropriations Bill ti badyet ti OVP iti P733.1 milion, kas met laeng ti naala ti nasao nga opisina ita a tawen.
Dimmalan iti atiddug a deliberasion ti alokasion ti OVP para iti 2026 nangruna iti kamara ta kiniddaw dagiti dadduma a kongresista a maibaba ti pondo ti OVP gapu ti saan nga idadar-ay ni Vice President Sara Duterte iti maikadua a panagdengngeg.
Naikkan isuna iti maysa pay a gundaway ken nagparang idi September 16 ket sinurot dagiti miembro ti mayorya ken minorya ti tradision ti parliamentary courtesy ken saanen a nasaludsod ti ania man a mainaig iti budget iti committee level.
