Maysa a baboy iti makaawat ti sarita ti tao ta ammona iti sumurot iti ibaga wenno bilin ti amona.
Iti pannaki-uman ti Bombo Radyo Vigan ken ni Jun Dahilig Fagaragan a taga-Mabusag, Badoc, Ilocos Norte, bassit pay laeng idi ti baboy a ni Makku ket nadlawennan a makaawat iti sarsaritaenna ta ammona iti sumurot kadagiti ibagana.
Segun ken ni Fagaragan, impadasda nga impupok wenno impan ti kulongan iti baboy ngem masansan idi a saan a makatalna ken agtalaw isu a binaybay-andan nga umar-arubayan iti pagtaenganda.
Immuna a napansin ni Fagaragan a makaaw-awat ni Makku idi intugotna a napan iti taltalon agingga nasanay.
Gapu ta kanayon nga addan iti pagtaenganda ket nasanay ni Makku a nu baraen iti aldaw ket mismo nga isu ti manglukat iti faucet ket digosenna ti bagina ken nu dadduma mapan iti CR tapno mabang-aran iti riknana.
Nawaya pay ni Makku a rumuar ken mapan iti kalsada ta ammona iti aglukat iti gate ken adda payen ti dua a bukodna a pagiddaan iti uneg ken ruar iti pagtaengan da Fagaragan.
Saan pay a kas kadagiti dadduma a baboy a feeds iti kankanenna nu diketdi kas kadagiti taraon nga ipapauneg dagiti tattao.
VIDEO – JUN DAHILIG FAGARAGAN 1
Inlawlawag ni Fagaragan a ti inana ti nanggatang iti baboy ket impatarakenna laeng kenkuana tapno pagsapulanda ngem ita a nakasursuro ni Makku ket maasian ta saanna a kayat a maparti nu man pay pito a bulannan a tartaraknenda ken mabalinen a mailako.
Adda payen ti nangidiaya a gatangenda ni Makku iti gatad a P20,000 ngem saanna a kabaelan nga ilako.
Gapu ta saan a maallukoy isuna ti inana ket gimmatangda manen ti maysa pay a baboy nga isunto ti mailako ngem kas ken ni Makku ket makasursuro manen a makaawat iti sarita ti tao.
Kabayatanna, saan a baboy iti talaga a tartaraknen ni Fagaragan nu diketdi aso ken pusa ta sangapulo ket walo ti tarakenna nga aso idinto a sangapulo ket lima iti pusa.
VIDEO – JUN DAHILIG FAGARAGAN 2
