VIGAN CITY – Umaboten iti 25,404 a baboy ti naidalan iti culling operation manipud kadagiti tallo a probinsia a naapektaran iti African Swine Fever a pakairamanan ti Ilocos Sur.
Iti pannaki-uman ti Bombo Radyo Vigan ken ni Department of Agriculture Region 1 African Swine Fever Focal Person Dr. Alfiero Banaag, 16,106 ti naikalidan idiay Pangasinan; 5,715 idiay La Union; ken 3,583 ditoy probinsia kalaksidan pay dagiti naidalan iti culling iti ili ti Sta. Lucia ta mayuray pay ti pannakaileppas ti operasyonda.
Adda ti maited nga agingga lima a ribo a pisos a tulong pinansial kas paset ti Indemnification Program ti ahensia para kadagiti duapulo a baboy a kukua dagiti agtartaraken a nagboluntaryo a mangisuko ti tarakenda ngem inlawlawag ti opisial a saan a karaman dagiti burias a mabayadan.
Maiproseso ti nasao a banag babaen iti panagperma ti tunggal agtartaraken kadagiti dokumento a maipasanto iti DA Central Office tapno insigida a mapondoan.
Kabayatanna, impasigurado ti opisial a numan pay kumarkaro ti ASF iti rehion ket kabaelanda a kontrolen tapno saanen nga agraira pay kadagiti sabali a lugar isu a nagpalagip nga irwamen latta ti panagdalus ken panangipatungpal kadagiti bio safety measures.
