Maibilangen ita ti negosyante a ni Atong Ang ken ni Gretchen Barretto a suspek iti pannakapukaw dagiti sabungero, segun iti Department of Justice.
Idi masaludsod ni Justice Secretary Boying Remulla no maipila ti kaso kontra kada Ang ken Barretto ket insungbat met ti opisial a mapasamakto iti kabiitan a panawen.
Innayon ni Remulla a dumalan iti evaluation ti piskalya dagiti ebidensya tapno maamuan no ania dagiti kaso a maipila.
Maisagsagana payen ti case buildup kontra kadakuada ngem aminado ti opisial a narigat ti laban gapu iti pannakainaig ti kuarta ken koneksyon.
Ita nga aldaw ket impila ni Ang ti kaso kontra iti whistleblower a nanginagan kenkuana a mastermind iti pannakapukaw dagiti sabungero, ket kunana pay nga amangan ta kayatna laeng iti kuarta manipud iti grupoda.
