VIGAN CITY – Kaso nga Attempted Parricide ti sangwen ti maysa a lalaki ta binagkongna ti amana ta saan a naikkan ti paggatangna iti arak idiay Barangay Nagsangalan, Vigan City, Ilocos Sur itay alas dose kuarenta iti aldaw itattay (August 10, 2024).
Ti biktima ket agtawen iti innem a pulo ket innem, naasawaan idinto a ti suspek ket ni Rodolfo Galicia Buenaventura Jr. agtawen iti uppat a pulo ket dua, construction worker nga agpada nga agnaed idiay Barangay Nagsangalan, Vigan.
Iti pannaki-uman ti Bombo Radyo Vigan ken ni PMaj. Christopher Ramat a Deputy Chief of Police iti Vigan City Police Station, nakaawatda ti pakaammo inaig ti napasamak a pammagkong isu a nagrespondeda ket naammoan a saan a nagkinnawatan dagiti agama ta saan a nakaited ti ama iti paggatang iti arak ti putotna.
Segun ken ni Ramat, bayat ti panagriri dagiti agama ket inruar ti suspek iti nakasabikel a patadem iti bakrangna ket isu iti imbagsolna iti biktima.
Nagsagaba ti biktima iti dunor iti akin-kannawan nga imana isu a naipan iti Ilocos Sur Provincial Hospital – Gabriela Silang, Tamag, Vigan City para ti pannakatamingna idinto a ti suspek ket nakemmeg karaman ti inaramatna a patadem.
Naduktalan a masansan a mapan agdawat ti suspek iti amana ti paggatangna ti arak ngem saanda a naikkan iti daytoy a gundaway nga isun ti panangdangranna iti amana.
Desidido ti pamilia ti suspek a pilaan ti kaso tapno maikkan ti pagnakman iti madi nga aramidna.
Balakad ni Ramat kadagiti umili a nu adda parikot kadagiti kameng ti pamilia ket nasaysayaat a kasarita ida iti napintas a wagas ngem tay agdidinnangran.
VIDEO – PMAJ. CHRISTOPHER RAMAT
