VIGAN CITY – Inpudnon dagiti nakalugan ti Toyata Hi – Ace Van kenni Governor Ryan Singson no siasinu iti akinkukua ti pito gasut a kilo a karne iti baboy a nasalamaan dagiti otoridad ken provincial quarantine office idiay Brgy. Catayagan, Sta. Lucia.
Nadakamat ni Governor Ryan Singson a ti negosyante nga agnagan ti Amanda Gonzales ditoy Vigan City iti innaganan dagiti tallo a negosyante a nakemmeg idi kalman, November 27 gapu iti panangilibas da kuma a panangiserrek iti karne ti baboy a naggapu idiay Bulacan.
Agsipud iti dayta, malidayan ni Singson ket saan na a mawatan no apay a naaramid iti nasao a negosyante nga agilibas iti karne ta idi naglabas ket nagpatulong pay kenkuana.
Inaklon ti gobernador a narigat a mabantayan iti quarantine checkpoint ditoy probisya ta agararamaten dagiti managgundaway a negosyante iti private a lugan a pangiluganan da kadagiti iligal a karne a maiserrek ditoy probinsya no man pay ammu da nga adda iti ordinansa ti probinsya ken executive order inaig iti pannakaiparit iti panangiserrek kadagiti baboy ken pork products a naggapu kadagiti lugar nga adda kumpirmado a kaso ti African Swine Fever ngem inkari ti gobernador nga aramiden da amin a kabaelan da tapno maduktalan no siasinu pay dagiti iligal nga agiserserrek iti karne ditoy probinsya.
Kabayatanna, nadakamat ni Provincial Quarantine Officer Martel Quitoriano a maidalan iti eksaminasyon wennu panagadal dagiti nasalamaan da a karne tapnu maamuan nu positibo iti sakit nga African Swine Fever wennu saan.
Mainaig dayta, kiniddaw dan ti Department of Agriculture a ma-test dagiti sample nga innala da manipud ti walo a drum ti karne a naala da kadagiti tallo a negosyante.
Pinunas ni Quitoriano iti panagdanag dagiti agtartaraken ti baboy ditoy probinsiya agsipud ta dinalusan da a naimbag iti van a nakaikargaan dagiti nasao a karne babaen iti disinfectant.
