Agtultuloy nga ad-adalen ti review committee ti Office of the Executive Secretary ti courtesy resignation dagiti gabinete ni Presidente Ferdinand Marcos Jr.
Iti ambush interview, pinasingkedan ni Executive Secretary Lucas Bersamin nga ipangruna ti review committee dagiti gabinete a mangimatmaton iti napateg nga opisina ti gobierno.
Uray no saan a dinakamat ni Bersamin dagiti ahensia a matutukan, ket kunana a karaman ditoy dagiti opisina a direkta nga agserserbisyo iti publiko iti inaldaw.
Kalpasanna daytoy ket isarunodanto ti sabali nga ahensia a saan unay a direkta ti serbisyo iti publiko, kas dagiti research agency.
Aminado ni Bersamin nga adda sumagmamano nga ahensia a saan a mabalin a garawen wenno sukatan ti mangidaulo ken saan a mabalin a darasen ti proseso, ngem impasiguradona ti due process wenno ti patas a proseso, no kas bilang agbaliktad ti desisyon ti review committee ken ti presidente.
