VIGAN CITY – Kaso a malicious mischief, panaglabsing ti provincial ordinance inaig iti panagbansag kadagiti lugan iti national highway ken panagkedked a sumurot kadagiti pannakabagi ti linteg iti sanguen ni Jefferson Gandez nga agtawen ti sangapulo ket walo nga agnaed idiay Barangay San Antonio, Narvacan a nangbansag ti Partas bus a minaneho ni Romeo Lazarte Jr., nga agtawen ti uppat a pulo ket lima, naasawaan ken agnaed idiay Barangay Sulvec, Narvacan idi alas dyes y media iti rabii ti October 6 idiay national highway ti Barangay San Antonio.
Pinasingkedan ni Police Captain Arcadio Viloria, hepe ti Narvacan municipal police station, a ti suspek ket parikot iti barangay da agsipud ta adda lokloko na ken saan na a dengdenggen ti ama na kasta pay nga adda idiay abroad ti ina na isu nga awan ti mangbagbaga ken mangdisiplina kenkuana.
Itay kallabes, nairaman pay ti suspek iti panagtakawan ti cellphone ti ikit na ngem gapu ta insubli na ti cellphone a tinakaw na, saanen a nakasoan.
Innayon pay ni Viloria nga adu ti barkada ti suspek a posible a kakadua na pay nga agar-aramid kadagiti maikaniwas iti linteg idiay Narvacan ta idi nakemmeg ket adda dagiti innaganan na a nasurok a sangapulo a kakadua na.
Malaksid iti dayta, ti nagkamangan na idiay Barangay Sta. Lucia idi naubor nan iti nasao a bus ket isu ti paglemlemmengan dagiti agtutubo nga aguli-uli idi kadagiti pagtagilakoan idiay ili ti Narvacan.
