VIGAN CITY – Pimmusayen ni Rodolfo Christan Pancho II, ti Grade 10 student nga agtawen iti sangapulo ket uppat a pinagtripan a pinalek dagiti dua a lallaki idiay Santa idi parbangon ti July 7 kabayatan a daldalyasaten na ti national highway idiay Marcos District , kadua na ti gayyem na nga agtawen iti sangapulo ket innem.
Mainaig dayta, hustisya iti kiddaw ti pamilya ti biktima, nangruna ti ama na a nangibaga a nasingpet ti putot na ken saan unay a maun-uni ta saan na pay pulos a naibagbaga dagiti ar-aramiden kenkuana dagiti suspek.
Maipalagip nga inbaga ni Police Lt. Jerry Arzabal, hepe ti Santa municipal police station, a naamuan da babaen ken ti gayyem ti biktima nga agtawen iti sangapulo ket innem a sakbay iti pasamak ket kanayon nga ibully, pagkikinnatawaan ken ibaon-baon dagiti suspek ti biktima tunggal makita da iti computer shop.
Gapu ti pannakatay ti biktima, kaso a murder iti sangwen dagiti suspek a da Rollie John Bringas nga agtawen iti sangapulo ket siyam a taga- Quezon District, Santa kenni Harvee Sedantes nga agtawen iti dua pulo ket maysa a taga- Pasungol, Santa a nairupaan ti kadua ti biktima idi napasamak iti insidente.
