VIGAN CITY – Agtultuloy ti imbestigasyon ti kapulisan ken dagiti opisyales ti Brgy. San Pedro, Narvacan inaig iti nasarakan a maladaga iti bakante a lote iti igid ti kalsada.
Iti pannaki-uman ti Bombo Radyo Vigan kenni Carolina Carsola, nakakita ti maladaga, sakbay a nasarakanna ti maladaga ket napan isuna nagdalos ti bakante a lote idi kalman oras ti alas sais ti malem ngem awan palaeng ti maladaga ti nasao a lugar.
Tattay bigat napanunutanna a sublianan ti bakante a lote ta abunganna kuma ti abot a nagpuoranna ngem nakigtot ni Carolina ta nakitana ti maladaga nga agruprupsan ken adda ti nabangsit nga angotna.
Segun kenni Barangay Captain Ernie Molina, burburtiya kadakuada no siasinu ti nangibelleng ti lalaki a maladaga a patta-pattaen da a dua agingga uppat nga aldaw a natayen.
Immandarnan kadagiti barangay health worker ken barangay nutrition scholar a kitaen dagiti masikog ti lugarda tapno maammuan no siasinu ti responsable ti panangibelleng ti maladaga.
Kitkitaenen dagiti otoridad ti rekord no adda dagiti masikog a nag-anak ti nasao a lugar tapno maduktalan no siasinu ti nangibelleng wenno nangipan ti natay a maladaga a lalaki kas kinumpirmaran ni Police Executive Master Sergeant Analisa Jamandra ti Narvacan Municipal Police Station.
