VIGAN CITY – Agpada a pimmusay dagiti agasawa a nalugan iti tricycle idiay Brgy. Vical, Sta. Lucia gapo iti pannakadungparda iti Isuzu Close Van Delivery truck.
Nabigbig dagiti nakalugan ti tricycle a pimmusay a da Romeo Salas, agtawen lima pulo ket pito kenni Maximina Salas agtawen uppat a pulo ket siyam nga agnaed ti Banggar, La Union.
Basar ti imbestigasyon dagiti pannakabagi ti linteg ti Sta. Lucia Municipal Police Station, nagovertake ti truck a minaneho ni Wilfredo Hementera nga agnaed ti Brgy. San Juan Accfa, Cabanatuan, Nueva Ecija ngem sakto a sumungsungad ti tricycle a nagluganan dagiti agasawa.
Naitaray idiay Ilocos Sur Ditrict Hospital Sta. Lucia dagiti biktima ngem naideklara a dead on arrival gapo iti nakaro a dunor a sinagrap da iti aksidente.
Iti agdama maisagsaganan iti kaso a reckless imprudence resulting to double homicide and damage to property kontra ti nagmaneho iti truck.
