Pinaglibakan ti Armed Forces of the Philippines (AFP) ti kaudian a sarita ti Chinese Embassy maipanggep ti presensya ti BRP Sierra Madre idiay Ayungin Shoal, ken impaganetgetda nga awan iti maipatpatungpal a tulagan wenno binding commitment iti Pilipinas a mangbilin nga ikkaten ti barko iti nasao a lugar.
Segun ken ni AFP Spokesperson for the West Philippine Sea (WPS) retired Rear Admiral Roy Vincent Trinidad, pangpanggepen ti Beijing a baliwan ti pakasaritaan bayat a baybay-anda ti inawagan ti militar a panangallilaw iti pakasaritaan iti China idiay West Philippine Sea.
Kinuna ni Trinidad, nainget a kinontra ti AFP ti sarita ti Chinese Embassy idiay Manila maipanggep ti presensya ti BRP Sierra Madre idiay Ayungin Shoal.
Impabasol pay ni Trinidad ti panagsakup ti China iti Panganiban Reef a nalatak nga internationally kas Mischief Reef idi 1995.
Immunan a kinuna ti China a dagiti naipatakder nga istruktura iti bahura ket paglinungan laeng para kadagiti mangngalap ken awan iti gagem ti militar.
No pay kasta ket nagbalin a dakkel a military installation a nga airstrip, radar facilities ken dagiti imprastruktura para iti navy.
