Pinadayawan ti Armed Forces of the Philippines (AFP) ni Captain Jerome Jacuba, ti suldado a nabulsek kalpasan a napabettakan iti naisayangkat nga operasyon idiay Datu Salibo, Maguindanao.
Indauluan ni AFP Chief of Staff General Romeo Brawner Jr. iti panagbisita iti nasao a suldado iti kalman ket impaayanna ti Kalasag Plaque para iti serbisyona.
Naikkan pay ti grocery package kas panangipakita iti suportar ken kinapateg ti nasao a kapitan.
Babaen iti pannarabay ni Pres. Ferdinand Marcos Jr., manamnama a ma-promote ni Captain Jacuba iti ranggo a Major ken ma-assign iti baro a trabaho.
Makikamkammayet ti AFP iti Department of National Defense tapno isayangkat ti komprehensibo a panangadal iti Conflict Disability Discharge policy tapno masigurado nga awan ti disabled personnel iti mabatbati kangrunaan no naalada iti sagsagabaenda bayat iti panagakemda.
