Binilin ni Philippine National Police acting chief Lt. Gen. Jose Melencio Nartatez Jr., dagiti amin a yunit ti kapulisan nga ingato dagiti addang iti salun-at tapno masalwadan dagiti kameng ken publiko iti baet dagiti kaso ti seasonal flu a nangitunda iti pannakasuspenso ti klase idiay Metro Manila.
Kasaruno daytoy ti pammilin ni Presidente Ferdinand Marcos Jr., babaen iti pannarabay ni Interior Secretary Jonvic Remulla, a masigurado ti agtultuloy a pannakaipaay ti serbisio publiko bayat a masalsalwadan ti salun-at ken kasasaad dagiti kameng ti gobierno ken komunidad a pagserserbianda.
Napalagipan pay dagiti opisina ken quarters ti kapulisan a siguradoen ti umdas a bentilasion ken kinadalus iti ania man nga oras.
Nabilin pay ti PNP Health Service a mangisayangkat iti regular a panangkita iti salun-at ken naannad a panangbantay kadagiti personnel a mangipakpakita iti sintomas kas ti trangkaso, tapno maikkan ida ti medical attention.
