VIGAN CITY – Ad-adu pay nga estudyante a Pilipino ti nakaawat ti scholarship ken educational subsidies iti administrasyon ni President Ferdinand Marcos Jr. ngem kadagiti napalabas nga administrasion, segun ken ni Commission on Higher Education (CHED) Chairperson Secretary Prospero De Vera.
Agarup 700,000 nga estudyante ti nabenepisiaran iti nadumaduma nga scholarship nga idiadiaya ti commission.
Karaman kadagitoy ti Merit Scholarship Program, grade-based scholarship a mangipaay ti financial assistance a makatulong iti tuition, school fees, book allowance ken dadduma pay.
Tulongan pay ti “Tulong Dunong” Scholarship program ti CHED dagiti ubbing manipud kadagiti pamilia a benepisiaryo ti Pantawid Pamilya Pilipino Program (4Ps).
Kinuna ni De Vera a nangnayon ti Kongreso ti P2 billion iti nasao a programa tapno mapalawa ti sakupna.
Malaksid iti libre a matrikula kadagiti state universities and colleges ken local universities and colleges kas bilin ti linteg, mangipapaay met ti CHED iti scholarship para kadagiti ubbing a mangala iti kurso nga adda pakainaigan ti Agrikuktura.
