
Indagadag ni House prosecution spokesperson Rep. Zia Alonto Adiong iti kampo ni Bise Presidente Sara Duterte a saan nga agbalin a kudil ti sibuyas wenno argsagid idi napagsaludsodan maipapan iti aktibidad ti bise presidente iti panagmula iti kayo ken ti posible a koneksionna iti Cale88 Foods Corporation.
Segun kenni Adiong, marepaso amin nga impormasion tapno maamuan ti sibubukel a kinapudno agsipud ta dagiti pudpudno a nasaktan iti panagdengngeg ket dagiti umili.
Inlawlawagna a pagrebbengan ti prosekusion ti mangibagi iti estado ken ti publiko, isu a kasapulan nga iruar ken sukimaten ti impormasion ken ebidensia a mainaig iti kaso.
Innayonna a maawatanda no ti kampo ni Duterte ket agsapsapul iti simpatia ken paregtaenna dagiti mangsupsuporta kadakuada a mangiyebkas iti suporta.










