
Simmangpet ni Presidente Ferdinand Marcos Jr. sadiay Shenzhen Baoan Airport, China idi malem ti Miyerkules a naglugan iti PR001 tapno makipaset iti maika-33 nga Asia-Pacific Economic Cooperation (APEC) Economic Leaders’ Meeting.
Nagturong a diretso ni Presidente Marcos iti gala dinner sakbay a rinugianna ti agsasaruno nga aktibidad iti simmaruno a dua nga aldaw.
Mangisayangkat ni Marcos iti bilateral meetings kadagiti lider ti Peru, Papua New Guinea ken Chile tapno pagsaritaanda dagiti isyu a mangapektar iti global economy, trade ken supply.
Manamnama met a mapagsasaritaan ti posible a negosasion maipapan iti taripa ken dadduma pay a trade agreements iti nagbaetan ti Pilipinas ken dagiti kangrunaan nga ekonomia iti lubong, segun ken ni Philippine Ambassador to China Jaime Florcruz.










