--Ads--

Umabot iti 16 a pulis ti nadunor ken 11 a nagprotesta ti nakemmeg kalpasan a naaddaan iti komprontasion iti nagbaetan dagiti otoridad ken militante a grupo idiay Liwasang Bonifacio, Manila, segun iti Manila Police District.

Nagsagrap iti minor injuries dagiti pulis idi maaddaan iti pisikal a rinnupak kalpasan a linapdan dagiti nagprotesta ti ganda a panagmartsa a mapan iti Philippine International Convention Center (PICC) idiay Pasay City, a pakaang-angayan dagiti aktibidad para iti 49th ASEAN Summit.

Karaman kadagiti iprot-protesta ti grupo ti panagbisita ni US President Donald Trump iti Pilipinas ken ti gakat a Pax Silica initiative, idinto a kinondenar met ti Kilusang Mayo Uno (KMU) ken Alliance of Concerned Teachers (ACT) ti mapapati a naranggas a dispersal ti kapulisan.

Kabayatanna, Impasigurado ti PNP a raemenda ti karbengan ti publiko iti nakappia a panaguummong ken nabilin dagiti pulis a pagpannurayenda ti propesionalismo ken panangdayaw iti karbengan a pangtao iti panangipatungpalda iti seguridad para iti ASEAN Summit.

-- ADVERTISEMENT --