
Naisayangkat ita nga aldaw ti wreath-laying ceremony iti Ilocos Sur kas panangrambak iti maika-136 nga anibersaryo ti pannakaiyanak ni dati a Presidente Elpidio Quirino, ti maikanem a Presidente ti Pilipinas.
Ti aktibidad ket indaulwan ni Ilocos Sur Governor Jerry Singson, agraman ti pamilia Quirino ken dadduma pay nga opisial ti gobierno.
Iti pannaka-uman ti Bombo Radyo Vigan ken ni Cory Quirino, apo ti dati a presidente, pagyamananna nga iti tinawen ket agtultuloy a malaglagip ti publiko ti lolona ken dagiti naitulongna iti pagilian.
Segun ken ni Quirino, babaen iti agtultuloy a pananglagip iti dati a presidente ket maipasa met iti sumaruno a henerasion dagiti adal ken prinsipio nga imbatina.
Linagip pay ti apo ti dati a presidente ti maysa kadagiti napateg a decision nga Inaramid ti lolona idi nagtakem- nga isu ti panangipaayna iti pardon kadagiti Japanese war criminals a naibalud idiay Muntinlupa ken naituding koman a mapapatay.
Kunana a nagbalin a napateg nga addang ti desisionna iti panangrugi ti napintas a langen-langen ti Pilipinas ken Japan kalpasan ti riribuk.
Innayonna pay a makita itan ti bunga ti panagkappia dagiti dua a pagilian babaen iti agtultuloy a panagbalin a donor ti Japan iti Pilipinas.










