Maysa a car wash attendant ti nakemmeg gapu iti panangbagkongna idiay Escobar Compound, Sitio Namnama, Barangay Orence, Narvacan, Ilocos Sur.
Ti biktima ket lalaki nga agtawen iti duapulo ket lima, idinto a ti suspek ket lalaki nga agtawen iti tallopulo ket uppat, agpada nga agnaed iti nasao a lugar.
Maibasar iti imbestigasion, agpatpatang ti suspek ken ti asawa ti biktima mainaig iti pannakabingay dagiti sanikua ti pamiliada.
Nupay kasta, insardeng ti asawa ti biktima ti patangan, gapu ta nakainomdan dagitoy a dua.
Kalpasanna, binugkawan ida ti biktima, ken imbagana nga isardengna ti panagpatangda ta aginanadan.
Gapu dayta, nakapungtot ti asawa ti suspek ket nagturong iti nabara ti saritaanda iti biktima.
Kabayatan dayta a pasamak, mapapati a nangala ti suspek iti kutsilio iti pagtaenganda ket napan iti biktima sa binagkongna iti naminsan a daras iti kannigid a takyagna.
Nadunor ti biktima ket naitaray iti ospital para iti pannakatamingna, idinto a naanawa met ida babaen kadagiti karruba ken kabagyanda.
