Lima a tattao ti nakemmeg gapu iti panagtakawda kadagiti landok a kukua ti First Northway Development and Construction Corporation idiay Barangay San Agustin, Candon City, Ilocos Sur.
Ti biktima ket maysa a babai, agtawen iti uppat a pulo ket lima, representative ti FNDCC, ken agnaed iti Barangay Tablac.
Uppat met kadagiti suspek ti agnaed iti siudad ti Candon idinto a ti maysa ket agnaed iti Tagudin.
Nangrugi ti insidente idi ireport ti maysa nga akinkukua ti maysa a junkshop iti Barangay Bagar dagiti dua a lalaki a naggandat nga agilako iti adu a naputed a 16mm round bars.
Idi nagresponde dagiti pulis, naglibas dagiti dua a lalaki ket imbatida ti 690 a piraso ti landok a 110 cms ti kaatiddugna ken 79 nga agatiddug iti 65 cms, nga aggatad iti nasurok-kumurang ₱59,150, agraman dagiti dua a traysikel a naaramat iti panangipatulodda.
Boluntaryo a simmuko dagiti dua a suspek ken intudoda met laeng dagiti tallo pay a kakunsabusda.
Dagus a naiwayat ti hot pursuit operation a nagresultaan ti pannakakemmeg dagiti tallo pay a suspek iti aglawlaw met laeng ti nasao nga establisimiento.
Addan iti kustodia ti Candon City Police Station dagiti suspek para iti pannakaipila ti kaso.
