Impasigurado ni Philippine National Police (PNP) Chief General Jose Melencio Nartatez Jr. a sisasagana ti pulisia a mangipaay iti seguridad kadagiti saksi nga agparang iti International Criminal Court (ICC) mainaig iti kaso a crimes against humanity kontra ken ni dati a Presidente Rodrigo Duterte.
Inlawlawag ni Nartatez nga awan pay ti pormal a kiddaw manipud iti ICC ken nasken pay laeng a maikeddeng no ania dagiti saksi a kasapulan ti proteksion.
Nagkiddaw dagiti piskal ti ICC iti kanayonan a proteksion para iti 55 a saksi, pakairamanan ti panangilemmeng iti kinasiasinoda ken panangisayangkat kadagiti pribado a panagdengngeg.
Impaganetget ni Nartatez a paset ti pagrebbengan ti PNP ti panangsalaknib iti publiko ken impanamnamana nga agtignay ti pulisia tapno masigurado ti kinatalged dagiti saksi.
