Inlawlawag ni US Ambassador to the Philippines Lee Lipton nga awan ti saritaan wenno panagpirma mainaig iti plano ti Pax Silica Economic Security Zone iti naituding nga ASEAN Leaders’ Summit idiay Manila ita a Nobiembre.
Pinaglibakan pay ni Lipton ti posibilidad nga adda anunsio maipapan iti daytoy bayat ti umay a panagkitada kada Presidente Ferdinand Marcos Jr. ken US President Donald Trump iti igid ti summit.
Segun ken ni Lipton, nasken a lumasat iti naan-anay a konsultasion iti gobierno ti Pilipinas sakbay nga agdesision maipapan iti nasao a proyekto. Kinuna pay ni Philippine Ambassador iti US Jose Manuel Romualdez nga agtultuloy pay laeng ti negosasion isu a saan a nalabit a mairingpas ti katulagan iti nasao a summit.
Malagip a ti plano ti Pax Silica ket karaman ti pannakaibangon ti nasurok a 1,600 nga ektaria nga AI data center sadiay Capas, Tarlac a nakagun-od ti ibubusor manipud kadagiti progresibo a grupo ken ti komunidad ti Aeta gapu iti posible nga epektona iti lugarda.
