Pinainget ti National Capital Region Police Office (NCRPO) ti operasyon na kontra iti illegal water connections iti baet ti napadasan nga El Niño phenomenon ken umad-adu a panag kasapulan iti suplay ti danum ditoy pagilian.
Imbilin ti hepe ti NCRPO a ni Police Brigadier General Christopher Abrahano kadagiti lima a police districts iti Metro Manila a paingeten ti panagbantay kontra kadagiti indibidual ken grupo a mang gundaway iti nangato a konsumo ti danum.
Napapigsa metten ti koordinasion dagiti pulisya kadagiti water concessionaires, lokal a gobierno ken barangay officials tapno mabigbig dagiti lugar a mabalin nga addaan iti illegal water connections.
Nabilin dagiti polis a dagus a sumungbat kadagiti reklamo, mangisayangkat iti inspeksion ken mangidatag iti hustisia kadagiti adda iti likudan ti illegal operations, agraman dagiti financiers ken dagiti agkolekta iti bayad para kadagiti di otorisado a koneksion.
