Nangipila ni Senador Erwin Tulfo iti Senate Bill No. 2563 a ti gagemna ket salwadan dagiti mangmangged a Pilipino kontra iti pannakaikkat lattan iti trabaho gapu iti panagaramat iti Artificial Intelligence automation dagiti kompania.
Ituding ti gakat dagiti kondision tapno agbalin a patas ti panangikkat iti empleado, agraman ti nainkalintegan a panagaramat iti AI, kaawan ti sabali nga alternatibo, ken nainkalintegan a proseso.
Nakailanad pay ti panangted iti separation pay a saan a bumaba iti dua a bulan a sueldo wenno dua a bulan a sueldo kada tawen ti serbisio, aniaman ti nangatngato, ken innem a bulan a pakauna a pakaammo iti DOLE.
Sakbay a maaramid ti panagikkat, mabilin dagiti employer a maikkan nga umuna ti gundaway dagiti empleado a dumalan iti retraining wenno reskilling tapno adda kabaelanda nga agtuloy iti trabaho uray sumrek ti AI.
