Boluntaryo a simmuko ti lalaki a nangtagbat iti kaanakanna idiay Barangay Sinabaan, Bantay, Ilocos Sur.
Ti biktima ket agtawen iti duapulo ket innem, idinto a ti suspek ket agtawen iti uppat a pulo ket tallo, agpada nga agnaed iti nasao a lugar.
Maibasar iti imbestigasion, adda saan a nagkinnaawatan dagiti suspek ken biktima.
Iti pannaki-uman ti Bombo Radyo Vigan ken ni PLT. Ronie Corpuz, aglalaaw ti biktima a nakainom ken armado iti kutsilyo idin ta napanna dinarup ti suspek.
Aguk-ukis ti suspek iti nateng babaen iti kutsilyo idin ta gindandat ti biktima a bagkongen ngem nalapdan daytoy ti asawa ti suspek.
Ket iti dayta a gundaway, natagbat ti suspek ti biktima iti naminsan a daras babaen iti kutsilyo nga iggemna.
Nadunor ti kannigid a paset ti ulo ti biktima ket naipaagas iti ospital para iti naan-anay a pannakatamingna.
Maibasar pay iti pannakisarsarita dagiti pannakabagi ti linteg iti ina ti biktima, naammuan a ti suspek ti timmakder nga ama ti biktima sipud natay ti pudno nga amana.
Nupay kasta, saanen a mapilaan iti kaso ti suspek ta ipagpagapuda met laengen ti panagkakabagyanda.
