Target ti Commission on Elections (Comelec) a mapaadu ti bilang dagiti rehistrado a botante iti pagilian iti tallo a milion sakbay ti Mayo 2028 national ken local elections.
Segun ken ni Comelec Chair George Erwin Garcia, mangrugi ti siam a bulan a panagrehistro dagiti botante inton Nobiembre 10, 2026 agingga iti Hulio 30, 2027 tapno umadu ti bilang dagiti botante.
Inlawlawag ni Garcia a dagiti aplikasion ket repasuen ti Election Registration Board ken Automated Fingerprint Identification System tapno mailasin dagiti duplicate registrations ken madalusan ti voter list.
Impalagip ti Comelec kadagiti aplikante a saanen a maawat ti barangay certificate kas proof of identity ket imbes ketdi, masapul nga idatagda ti ID nga inruar ti gobierno wenno dadduma pay a valid ID nga addaan iti nagan, retrato, ken adres.
