Simmuko dagiti agassawa a mangmanmanehar ti pet crematorium sadiay San Jose del Monte, Bulacan iti National Bureau of Investigation (NBI) mainaig iti panangibellengda kadagiti natay nga aso ken pusa imbes a puoranda dagitoy.
Kinumpirmaran ni NBI Director Melvin Matibag nga awan ti umiso nga alikamen a mangpuor kadagiti ayup iti cremation facility ti Ahjay Paws Aftercare Pet Crematorium sadiay Bacoor, Cavite, isu nga inkalida dagitoy.
Mapapati nga inadmitir dagiti agassawa nga intabonda dagiti natay nga aso ken pusa iti tallo a pagibellengan gapu iti kaadu ti naipatulod a bangkay imbes a puoran dagitoy ken isublida dagiti dapo kadagiti akinkukua.
Naituding a mangipila ti NBI iti innem a kaso kontra iti Ahjay Paws Aftercare Pet Crematorium kalpasan nga imbilin ni Bacoor City Mayor Strike Revilla a maiserra ti pasilidad kalpasan a nagreklamo ti 250 a fur parents iti Bacoor Police.
