Inaresto ti Philippine Charity Sweepstakes Office (PCSO) ken ti National Bureau of Investigation (NBI) ti maysa a teller iti Camarin Road kalpasan a natiliwan a mangipapaay iti peke a ticket ti lotto ken agaw awat iti taya babaen ti GCash.
Mapatta patta a lima ribo a pisos ti gatad dagiti taya, cellphone, peke a ticket ken sibubukel nga alikamen ti lotto terminal ti narekober bayat ti operasion.
Nakumpiskar pay dagiti ticket rolls para iti naduma duma a lotto games, thermal receipt papers ken transaction documents a maaramat kas ebidensia.
Impakdaar ti PCSO a saanda a kunsintien ti aniaman a klase ti panagkusit ken panangloko ken inallukoy da iti publiko nga agpusta laeng kadagiti lehitimo a lotto outlets ken ireport da dagiti agus-usar kadagiti alternatibo a payment apps.
