Nakemmeg dagiti tallo a lalaki a nagaramat iti sabidong iti panagkalapda idiay Barangay Salapasap, Cabugao, Ilocos Sur.
Dagiti nakemmeg ket agtawen iti tallopulo ket walo, tallopulo ket uppat, ken duapulo ket innem, agpapada nga agnaed iti nasao nga ili.
Naaktuan dagiti tallo a lalaki nga agar-aramatda iti Poison Vine wenno Tubli kas sabidong iti panagkalap iti ikan, a mailabsing iti Section 92 ti Republic Act 10654.
Nakumpiskar iti operasion dagiti ramut ti nasao a mula, maysa a homemade scoop net ken mapatta-patta nga uppat a kilo ti ikan nga aggatad iti P800.
Naipan dagiti suspek ken dagiti naala nga ebidensia iti Cabugao Municipal Law Enforcement Team tapno maidalan iti husto a proseso sakbay a maipan iti Bureau of Fisheries and Aquatic Resources (BFAR) Ilocos Sur.
